SA ORAS NA AROG KAINI, SA ORAS NA INI

SA ORAS NA AROG KAINI, SA ORAS NA INI

Ginugurumos an sakong puso.
Gusto ko na maluha alagad ogma ako
Maogma asin mapungaw kaya na rumdumon,
        an mga naka aguing panahon.
Lalo na pag an oras hapon:
Malanit an saldang alagad maimbong an preskong duros amihan.
An imbong kan duros tamong asin ulunan na nagpapaturog sa pagal kong
hawak.
Dinuduyan ako kan maimbong na duros,
        dinadara ako sa lumang panahon,
        sa lugar na ako, na kami pa lang an nakaabot,
        sa lugar ko sa natad asin likod kan lumang harong.

Duman sa natad, sa oras na arog kaini...
        namamarong an antod kan mga payo kaidtong anom,
        ta haloy nagbatad,
        nagtuturo an ganot,
        nagnununo an sipon.
Naghaharapagan na naka-sangkayaw.
Nagdadarakop nin alibangbang -- tabatubol, niwang igit.
Napupurulot nin duli-duli sa poon kan sampalok.
Nagkarabayo sa palapa nin niyog.
Nagbaradilan nin dahon kan batag.
Nag-erispadahan nin bala.
Naki iwal na gamit an ginibong pana.
Nagharanap nin kurumbot -- may luno, may dikolor, masiram surupon.
Nagriligid sa oma na na-anihan pa sana, an hibo nagsaralak sa ganot kan
hawak.
Sa mga oras na ini, kaidto...

Dangan masiwit si Mama,...
        maluya lang na siwit,
        halabang siwit,
        imposibleng dae mo madadangog.
Dae siya kaipuhan magluwas sa harong, masiwit lang siya.

Ma saguinsaguin ka na dae mo nadadangog ta habo mo maistorbo
Nababangit ka ta habo mo na maglaog, habo mo na magdangog.

Sa oras na arog kaini, minasiwit si Mama
Tanganing magpagirumdom,
        na magluway-luway,
        na magpunas ganot,
        na magsirong ta mainit,
        na magmirindal nin linabunan na kamote, batag, duma,
        o kun minsan saludsod.
Kaidto nabangit ka na madangog an siwit ni Mama sa oras na arog kaini.

Alagad sa mga oras na ini, sa ngonian na panahon...

Gusto mong madangog guiraray an siwit ni Mama.
Gusto mong guiraray madangog,
        mamatean na igwa nin ina
        na nagpapaguirumdom
        na mag luway-luway
        na magpunas ganot
        na magpahingalo
        na magsirong ta mainit, o mauran,
        na magmirindal.

Gusto mong mamatean guiraray, sa siwit ni Mama
        na yaon siya sa pagpa guirumdom
        na dae ka makulugan, na mapagal, o magabatan.

Gusto mo na may madulokan,
        tangani na makapahengalo an hawak mo, an isip mo.
Gusto mo mamatean guiraray na mayo nin kagabatan.

Madangog an siwit ni Mama
Duman sa natad kan harong, sa oras na arog kaini...
        malanit an saldang, maimbong an duros amihan
        kuguson kan maimbing na duros na ini.

Arog kaidto, arog kan oras na ini kaidto...
Arog ngonian...
******************************
*************



Clemente S. Manaog
Office of the Administrator
National Statistics Office
Sta. Mesa Manila